BAROKKBANDIÐ BRÁK

Barokkbandið Brák var stofnað árið 2014 og hefur skipað sér fastan sess í íslensku tónlistarlífi. Í hópnum eru hljóðfæraleikarar sem hafa sérhæft sig í upprunaflutningi á tónlist barokktímans og vilja nýta þekkingu sína til að halda tónleika á Íslandi. Stofnendur Brákar voru fiðluleikararnir Elfa Rún Kristinsdóttir, Laufey Jensdóttir og Guðbjörg Hlín Guðmundsdóttir. Barokkbandið Brák hefur staðið fyrir fjölda tónleika í Reykjavík og víðar og fær reglulega til liðs við sig íslenska og erlenda hljóðfæraleikara, söngvara og dansara til að glæða tónlist fyrri alda nýju lífi. Þá hefur Brák haft það að leiðarljósi að efla nýja tónsköpun fyrir upprunahljóðfæri með því að frumflytja verk eftir íslensk samtímatónskáld. Brák hefur hlotið góðar viðtökur áheyrenda og gagnrýnenda og verið lofuð fyrir líflegt og fjölbreytt tónleikahald. Ríkisútvarpið hefur hljóðritað tónleika Brákar og útvarpað þeim. Hópurinn hefur margsinnis hlotið tilnefningu til Íslensku tónlistarverðlaunanna sem tónlistarflytjandi ársins og fyrir tónlistarviðburð ársins í flokki sígildrar og samtímatónlistar. Verðlaun í þeim flokki féllu hópnum í skaut fyrir tónleikana Brák og Bach sem fram fóru í Eldborg í Hörpu árið 2020.

CANTOQUE ENSEMBLE

Cantoque Ensemble er 8–12 radda sönghópur atvinnusöngvara sem allir hafa komið fram sem einsöngvarar og hlotið ýmsar viðurkenningar. Hópurinn var stofnaður árið 2017 og hefur tvívegis verið tilnefndur til Íslensku tónlistarverðlaunanna fyrir tónlistarviðburð ársins. Cantoque Ensemble hefur komið fram með barokksveitunum Höör Barock, Camerata Øresund og Ensemble Nylandia á tónleikum á Íslandi, í Danmörku og í Svíþjóð. Kórinn hefur flutt kantötur eftir Johann Sebastian Bach undir stjórn Andreasar Sperings og ný íslensk verk undir stjórn Steinars Loga Helgasonar, hvort tveggja á Sumartónleikum í Skálholti. Árið 2019 flutti hópurinn Jóhannesarpassíuna eftir Bach ásamt Barokkbandinu Brák undir stjórn Steinars Loga. Cantoque Ensemble hefur verið fastur gestur á Myrkum músíkdögum undanfarin ár og haldið rómaða portretttónleika sem helgaðir hafa verið tónskáldunum Jóni Nordal, Þorkatli Sigurbjörnssyni, Hjálmari H. Ragnarssyni og Hildigunni Rúnarsdóttur. Árið 2023 kom hópurinn fram í Sviss með kórnum Ensemble Chœur3 og flutti verk eftir Frank Martin og Philippe Körper. Fram undan hjá Cantoque Ensemble eru tónleikar með Eistneska fílharmóníukórnum og stjórnanda hans Tõnu Kaljuste í Tallinn þar sem flutt verða ný verk eftir Huga Guðmundsson og Helenu Tulve; flutningur nýrrar óratóríu eftir Högna Egilsson á Iceland Airwaves; og tónleikar með Camerata Øresund í Kaupmannahöfn.

RUBY HUGHES

Ruby Hughes er sópransöngkona frá Bretlandi. Hún hefur verið lofuð fyrir svipríkan flutning sinn á barokktónlist, tónlist frá klassíska tímabilinu og á nútímatónlist. Hún naut styrks breska ríkisútvarpsins BBC handa ungum tónlistarmönnum og fékk bæði fyrstu verðlaun og áheyrendaverðlaun í Händel-söngkeppninni í Lundúnum árið 2009. Viðurkenning Borletti-Buitoni-sjóðsins féll henni í skaut og hún kom til greina þegar veitt voru verðlaun Konunglega tónlistarvinafélagsins í Lundúnum. Ruby Hughes hefur komið fram víða um lönd á óperusviði, á einsöngstónleikum og með hljómsveitum, til að mynda í Wigmore Hall í Lundúnum, Fílharmóníunni í Berlín, Concertgebouw í Amsterdam, Garnier-óperunni í París og Carnegie Hall í New York. Hún hefur sungið á Proms-hátíð breska ríkisútvarpsins BBC, Edinborgar-hátíðinni og óperuhátíðinni í Aix-en-Provence. Hún hefur hljóðritað plötur á vegum útgáfufyrirtækjanna BIS, Chandos, Delphian og Hyperion sem sumar hafa unnið til verðlauna og hlotið viðurkenningu. Má þar nefna skífurnar Heroines of Love and Loss, sem hlaut Gullnu tónkvíslina í Frakklandi, og End of My Days. Ruby Hughes hefur unnið með fjölmörgum tónlistarmönnum og hljómsveitum í fremstu röð og dregur fram hlut kventónskálda og nútímatónhöfunda í störfum sínum og verkum.

JONAS NORDBERG

Jonas Nordberg lútuleikari nam við Mozarteum-háskólann í Salzburg og Konunglega tónlistarháskólann í Stokkhólmi. Hann starfar á alþjóðavettvangi sem einleikari, kammertónlistarmaður og hljómsveitarmeðlimur og hefur komið fram í fleiri en 25 löndum. Hann er á samningi hjá útgáfufyrirtækinu BIS og hefur sent frá sér fjölda platna sem hlotið hafa viðurkenningu, þar á meðal Intavolatura di chitarone, sem ritstjóri tónlistartímaritsins Gramophone hampaði sérstaklega, og Lessons með einleiksverkum eftir John Dowland. Einnig hefur hann gefið út plötuna Heroines of Love and Loss með sópransöngkonunni Ruby Hughes, sem hlaut Gullnu tónkvíslina í Frakklandi. Á tónleikum flytur Jonas Nordberg einkanlega verk fyrir lútu og teorbu eftir John Dowland, Robert de Visée, Silvius Leopold Weiss og Giovanni Girolamo Kapsperger sem hann fléttar oft saman við samtímatónlist. Hann starfar reglulega með Ruby Hughes, gömbuleikaranum Liam Byrne og kammerhópum á borð við El Gran Teatro del Mundo, Continuum og Orfeus Barockensemble. Jonas Nordberg hefur komið fram í Wigmore Hall í Lundúnum, Concertgebouw í Amsterdam, Fílharmóníunni í Berlín og Fílharmóníunni í París og leikur reglulega með fremstu barokksveitum og sinfóníuhljómsveitum í heimi.

LOW KEY ENSEMBLE

Low Key Ensemble er nýstofnaður kammerhópur sem samanstendur af fimm tónlistarmönnum sem leika á ólík bassahljóðfæri: barokklágfiðlu, barokkselló, barokkbassa, sembal og lútu. Meðlimir hópsins eru búsettir í Danmörku og Svíþjóð. Sem sjálfstætt starfandi hljóðfæraleikarar með ólæknandi barokkástríðu spila þau þvers og kruss um Norðurlönd og víðar. Meðlimir hópsins hafa lengi starfað náið saman í ýmsum hljómsveitum beggja vegna Eyrarsunds, til að mynda með Camerata Øresund og Concerto Copenhagen frá Danmörku og Höör Barock frá Svíþjóð. Löngun þeirra til að kafa dýpra ofan í hljóðheim bassahljóðfæra og útbúa efnisskrá fyrir þá hljóðfæraskipan leiddi til stofnunar Low Key Ensemble árið 2025. Tónleikar hópsins á Reykjavík Early Music Festival eru meðal fyrstu viðburða hans í þessari mynd.

HERDÍS ANNA JÓNASDÓTTIR 

Herdís Anna Jónasdóttir lærði á fiðlu og píanó og nam söng við Tónlistarskólann á Ísafirði. Að loknu stúdentsprófi frá Menntaskólanum á Ísafirði lagði hún stund á framhaldsnám við Listaháskóla Íslands undir handleiðslu Elísabetar Erlingsdóttur. Hún lauk námi frá Hanns Eisler-tónlistarháskólanum í Berlín árið 2012. Þar lærði hún hjá Brendu Mitchell, Önnu Samuil, Juliu Varady og Wolfram Rieger. Herdís Anna var þá ráðin að óperustúdíóinu við Óperuna í Zürich í Sviss. Þar tók hún þátt í fjölmörgum sýningum og meistaranámskeiðum, til að mynda hjá Brigitte Fassbaender, Francisco Araiza og Fabio Luisi. Herdís Anna hefur tekið þátt í mörgum óperuuppfærslum í Þýskalandi, á Íslandi og í Sviss. Meðal helstu hlutverka hennar eru Adína í Ástardrykknum, Adele í Leðurblökunni, Zerlina í Don Giovanni og Músetta í La bohème. Herdís Anna hefur komið fram á tónleikum með Kammersveit Reykjavíkur, Ríkishljómsveit Saarlands, Sinfóníuhljómsveit Íslands og Sinfóníuhljómsveitinni í Canberra í Ástralíu. Hún var valin söngkona ársins í Saarbrücken í Þýskalandi árið 2016 og hlaut Íslensku tónlistarverðlaunin sem söngvari ársins árið 2022 og Grímuna sem söngkona ársins árið 2019. Árin 2014–2018 var Herdís Anna fastráðin sem einsöngvari við Ríkisóperuna í Saarbrücken í Þýskalandi.

AINA KALNCIEMA

Aina Kalnciema fæddist í Ríga í Lettlandi. Hún stundaði framhaldsnám í píanóleik og orgelleik við Tónlistarháskólann í Sankti Pétursborg og hélt í kjölfarið til náms í semballeik í Hollandi, Frakklandi, Sviss og Þýskalandi. Hún lék á tónleikum víðs vegar í Sovétríkjunum og hefur komið fram í Bandaríkjunum, Kanada, Ástralíu, á Nýja-Sjálandi og víða um Evrópu. Hún hefur leikið með Fílharmóníuhljómsveit Sankti Pétursborgar, Moskvuvirtúósunum og öllum helstu hljómsveitum í Eystrasaltslöndum. Aina Kalnciema hefur leikið með fiðluleikaranum Baibu Skride og gömbuleikaranum Paolo Pandolfo og komið fram með hljómsveitum á borð við La Petite Bande, Musica Antiqua Köln og Les Arts Florissants. Semballeikur hennar hefur komið út á mörgum hljómplötum. Aina Kalnciema var prófessor við Tónlistarháskóla Lettlands í 30 ár og fór fyrir kennslu á sembal þar. Hún er forseti Bach-félags Lettlands og hefur staðið fyrir Bach-hátíðinni í Ríga síðan árið 2001. Henni hafa hlotnast ýmsar viðurkenningar fyrir framlag sitt til tónlistarlífs í Lettlandi, ekki síst fyrir störf sín á vettvangi Bach-félagsins. Aina Kalnciema er óþreytandi við að koma ungum lettneskum tónlistarmönnum á framfæri á erlendri grundu og leggur mikla rækt við menntun og þroska þeirra. Hún hefur í því skyni komið á fót tónlistarkeppni á sviði snemmtónlistar þar í landi.

NATALIA DUARTE

Natalia Duarte er víóluleikari frá Kosta Ríka sem búsett er á Íslandi. Hún lærði á nútímavíólu við Háskólann í Arisóna og nam upprunaflutning, barokkvíóluleik og tónlistarkennslu í Barselóna, Mílanó og Veróna. Hún hefur leikið með fjölda hljómsveita og kammerhópa sem sérhæfa sig í sögulegum tónlistarflutningi víðs vegar um Evrópu og komið fram á Händel-hátíðinni í Halle, snemmtónlistarhátíðinni í Innsbruck og Monteverdi-hátíðinni í Kremóna. Hún hefur unnið með stjórnendum á borð við Rinaldo Alessandrini, Philippe Herreweghe og Giovanni Antonini. Natalia hefur hljóðritað plötur með ýmsum hópum fyrir útgáfufyrirtækin Naxos, Lindoro, CPO og Da Vinci. Á Íslandi hefur hún leikið með Barokkbandinu Brák, Cauda Collective, Camerarctica, Kammersveit Breiðholts og ConsorTico, sem kom fram á Reykjavík Early Music Festival árið 2024. Þá hefur hún komið fram á Sumartónleikum í Skálholti og í Salnum í Kópavogi. Hún vinnur með fjölmenningarlegum hópum sem tónlistarkennari í verkefninu Tónagulli í Hafnarfirði og heldur mánaðarlega tónlistarstund í Norræna húsinu í Reykjavík. Hún tók einnig þátt í barnahátíðinni Kátt árið 2024.

CHRISTINA PLUHAR

Christina Pluhar er einn virtasti lútuleikari og hljómsveitarstjóri í heimi á vettvangi tónlistar fyrri alda. Hún kemur fram úti um allan heim með hljómsveit sinni L’Arpeggiata. Christina Pluhar nam klassískan gítarleik í heimaborg sinni Graz í Austurríki, lærði á lútu við Konunglega tónlistarháskólann í Haag í Hollandi og stundaði framhaldsnám við Schola Cantorum Basiliensis í Sviss þar sem hún lagði rækt við forna tónlist. Hún lærði einnig að leika á barokkhörpu í Basel og í Mílanó. Frá árinu 1992 hefur hún starfað í París. Hún hefur komið fram sem einleikari með fremstu barokksveitum heims, og leikið fylgirödd með þeim, og tekið þátt í helstu tónlistarhátíðum í Evrópu. Árið 2000 stofnaði hún hljómsveitina L’Arpeggiata sem vakið hefur athygli fyrir líflega og nýstárlega túlkun á tónlist 17. aldar. Margar hljóðritanir sveitarinnar hafa hlotið alþjóðleg verðlaun, þar á meðal Gullnu tónkvíslina, Echo Klassik-verðlaunin og Opus Klassik-viðurkenninguna. Christina Pluhar hefur einnig stýrt sviðsverkum við góðan orðstír og stjórnaði leikinni uppfærslu á óratóríunni Beltsasar eftir Händel við Theater an der Wien árið 2023. Frá árinu 1999 hefur hún kennt á barokkhörpu við Konunglega tónlistarháskólann í Haag.

L'ARPEGGIATA

Christina Pluhar stofnaði hljómsveitina L’Arpeggiata árið 2000. Sveitin er einn þekktasti og virtasti snemmtónlistarhópur heims. Þar sameinast tónlistarmenn úr ólíkum tónlistarhefðum um metnaðarfull verkefni þar sem saman fara bestu rannsóknir á tónlist fyrri alda og ólgandi sköpunargleði Christinu Pluhar. Hljómur sveitarinnar, sem byggist á plokkuðum strengjahljóðfærum, er rómaður og auðþekktur. Christina Pluhar leiðir sveitina á tónleikum og beinir jafnan sjónum að lítt þekktri tónlist frá því snemma á barokktímanum sem hún sækir til Rómar, Napólí og Spánar. Christina Pluhar leggur áherslu á frjálsan spuna og sjónræna upplifun áhorfenda þar sem tónlist, söngur, dans og leikhús verða eitt. Sveitin skapar gjarnan bræðing úr ólíkum tónlistarstefnum þar sem kennir djassmúsíkur og þjóðlagatónlistar. Með þessu vill sveitin minnast upprunalegrar merkingar barokksins — hinnar óreglulegu perlu — þar sem frelsi og sköpun ráða ríkjum. Hljómsveitin L’Arpeggiata hefur unnið með framúrskarandi einsöngvurum líkt og Philippe Jaroussky, Núriu Rial og Véronique Gens og komið fram í virtum tónlistarhúsum á borð við Concertgebouw í Amsterdam, Wigmore Hall í Lundúnum og Carnegie Hall í New York. Upptökur með leik sveitarinnar hafa hlotið fjölda alþjóðlegra verðlauna. Hljómsveitin nýtur stuðnings frá menningarmálaráðuneyti Frakklands, frá höfuðborgarhéraðinu Île-de-France og úr samfélagssjóði fjarskiptafyrirtækisins Orange.

VINCENZO CAPEZZUTO

Söngvarinn Vincenzo Capezzuto býr yfir einstæðri söngrödd sem hann kýs að skilgreina ekki nákvæmlega. Hljómblær söngraddar hans er tær og raddsviðið vítt sem gerir honum kleift að flytja mjög ólíkar gerðir tónlistar, ekki síst tónlist fyrri alda. Vincenzo Capezzuto hefur margoft komið fram með hljómsveitinni L’Arpeggiata undir stjórn Christinu Pluhar og sungið á hljóðritunum með þeim. Hann hljóðritaði plötuna Gondola með söngkonunni Ceciliu Bartoli og hljómsveitinni Il Pomo d’Oro. Flutningur hans þar á feneyskum söngljóðum frá 18. öld hlaut lof gagnrýnenda. Capezzuto hefur komið fram á tónleikasviði sem Venus í Il ballo delle ingrate eftir Claudio Monteverdi, í Salve Regina eftir Antonio Vivaldi og sem guðspjallamaðurinn í Matteusarpassíunni eftir Johann Sebastian Bach. Að auki hefur hann lagt áherslu á verk eftir Franz Schubert og á þjóðlagatónlist frá Napólí. Vincenzo Capezzuto er til viðbótar við söngferil sinn atvinnudansari. Hann hefur komið fram í sýningum eftir danshöfunda á borð við August Bournonville, George Balanchine og William Forsythe. Capezzuto hefur dansað sem sólisti í sýningum við Enska þjóðarballettinn og í San Carlo-óperuhúsinu í Napólí, og hlotið viðurkenningar fyrir dans sinn, þar á meðal verðlaun sem kennd eru við Léonide Massine annars vegar og Giuliönu Penzi hins vegar.

DÚÓ STEMMA

Dúó Stemmu skipa Herdís Anna Jónsdóttir víóluleikari og Steef van Oosterhout slagverksleikari. Bæði eru þau hljóðfæraleikarar í Sinfóníuhljómsveit Íslands en hafa leikið saman tvö sem Dúó Stemma í fjölmörg ár og búið til skemmtilega og fræðandi dagskrá fyrir börn á öllum aldri. Dúó Stemma hefur leikið á barnatónleikum sínum á fjölmörgum leikskólum og í skólum á höfuðborgarsvæðinu og víðs vegar um land. Einnig hafa þau komið fram í Hörpu, Salnum í Kópavogi og Hofi á Akureyri. Þá hafa þau leikið fyrir börn í Færeyjum, á Grænlandi og í Hollandi og árið 2019 komu þau fram á fjölskyldutónleikum í Konzerthaus í Berlín. Árið 2008 hlutu þau viðurkenningu fyrir framlag sitt til barnamenningar á Íslandi.

REYKJAVÍK BAROKK

Kammerhópurinn ReykjavíkBarokk var stofnaður árið 2012 og hefur síðan unnið ötullega að eflingu íslenskrar barokksenu. Hópurinn samanstendur af hljóðfæraleikurum og tónlistarkennurum sem leika á upprunahljóðfæri og einbeita sér að flutningi fornrar tónlistar í bland við samtímatónlist. Hópurinn fléttar íslenskan þjóðlagaarf, kveðskap og frásögn gjarnan inn í verkefni sín og hefur unnið með sviðslistafólki úr ýmsum áttum. Kammerhópurinn ReykjavíkBarokk leggur áherslu á að flytja sjaldheyrð verk og tónsmíðar eftir konur samhliða þekktari perlum tónlistar fyrri alda. Hópurinn hefur nýtt tónleikhúsformið til að kynna sögur og tónlist kvenna fyrir nýjum áheyrendum á lifandi og aðgengilegan hátt. Kammerhópurinn ReykjavíkBarokk hefur komið fram á Sumartónleikum í Skálholti, Háskólatónleikum, Listahátíð í Reykjavík, Sumartónleikum við Mývatn, Sumartónleikum í Akureyrarkirkju, í Barokksmiðju Hólastiftis og víðar. Í september árið 2019 stóð hópurinn í fyrsta sinn fyrir forntónlistarhátíðinni Konu í Skálholtsdómkirkju og Seltjarnarneskirkju þar sem listsköpun kvenna var sett í öndvegi. Hátíðin hefur farið fram annað hvert ár síðan. Kammerhópurinn ReykjavíkBarokk vinnur iðulega með listamönnum úr röðum atvinnumanna og áhugamanna og leitast við að skapa sameiginlegan vettvang þeirra. Kammerhópurinn stendur fyrir Krakkabarokki í fjórða sinn í ár. Þar koma barnakórar og tónlistarnemendur til liðs við hópinn á fjölskyldutónleikum sem helgaðir eru tónlist fyrri alda og íslenskum þjóðlögum.

DARINA ABLOGINA

Darina Ablogina flautuleikari er búsett í Basel í Sviss og hefur sérhæft sig í barokkflautuleik. Hún er sjálfstætt starfandi tónlistarkona, kennari og listrænn stjórnandi, og hefur lagt fyrir sig einleik og kammertónlistarflutning. Hún lærði við Tónlistarháskólann í Moskvu og Schola Cantorum Basiliensis í Sviss og hefur hlotið ýmsar viðurkenningar, þar á meðal verðlaun í Van Wassenaer-keppninni, REMA-verðlaunin og styrk frá samtökunum Early Music America. Hún var valin til að taka þátt í International Young Artist Performance í Antwerpen og hefur leikið með Orchestra of the Age of Enlightenment. Darina Ablogina hefur komið fram með hljómsveitum sem leika á upprunahljóðfæri um alla Evrópu og flutt tónlist allt frá barokktímanum til rómantíska tímabilsins. Hún hefur hljóðritað plötu með Orkester Nord fyrir útgáfufyrirtækið Aparte. Hún starfar einnig sem útgefandi og er stjórnandi hlaðvarpsins (in)sight-reading sem er tileinkað fræðslu um barokktónlist og nótnalestur. Darina Ablogina leikur jöfnum höndum á barokkþverflautu (traverso) og blokkflautu og leggur áherslu á skapandi og fræðandi tónlistarflutning.

PETER CROTON

Peter Croton er svissnesk-bandarískur lútu- og gítarleikari. Hann nýtur alþjóðlegrar viðurkenningar fyrir tónlistarflutning sinn, hljóðupptökur, tónsmíðar, kennslu og fræðistörf sem lúta að upprunaflutningi. Hann hóf tónlistarferil sinn sex ára gamall sem þjóðlagagítarleikari og söngvari og lauk síðar námi í klassískum gítarleik og lútuleik við Oberlin-tónlistarháskólann og Schola Cantorum Basiliensis í Sviss. Croton hefur komið fram víða um heim sem einleikari og kammertónlistarmaður og hljóðritað ýmiss konar tónlist frá endurreisnartímanum til rómantíkurinnar sem gefin hefur verið út á mörgum hljómplötum. Hann vann fyrstu verðlaun í Erwin Bodky-keppninni árið 1984 og hefur unnið með fjölmörgum söngvurum og hljóðfæraleikurum í Evrópu og Norður-Ameríku. Hann kennir á lútu og rómantískan gítar við Schola Cantorum Basiliensis og tónlistarháskólana í Basel og Bern í Sviss. Þar veitir hann einnig tilsögn í sögulegri flutningshefð og því hvernig leika skal fylgirödd. Peter Croton hefur gefið út kennslubækur og tónsmíðar fyrir söngrödd og lútu. Hann er formaður Þýska lútufélagsins (Deutsche Lautengesellschaft).

KYRJA

Kyrja er íslenskur karlasönghópur sem stofnaður var árið 2022. Meðlimir Kyrju eru allir reyndir atvinnusöngvarar sem vilja víkka út hugmyndir fólks um kórtónlist. Kyrja reið á vaðið með Nótt eftir Árna Thorsteinsson og Röngum manni eftir Jónas Sigurðsson í nýrri og áhrifamikilli útsetningu en eitt markmið hópsins er að setja vel þekkt lög í nýjan búning. Auk þess flytur Kyrja klassísk verk, nú síðast Næturvöku eftir Sergej Rakhmanínoff með systurhópi sínum, Yrkju, í Norðurljósum í Hörpu árið 2025. Annað markmið hópsins er að flytja nýja tónlist. Kyrja hefur þegar frumflutt lög eftir Hafstein Þórólfsson og Philip Barkhudarov og stefnir á að verða leiðandi afl í frumflutningi nýrrar tónlistar og samstarfi við aðra tónlistarmenn úr fjölbreyttum geirum tónlistar. Kyrja og meðlimir hennar hafa unnið með Júníusi Meyvant og hljómsveitinni Kaleo og sungið inn á tölvuleikinn God of War Ragnarök. Tónlistin úr leiknum hefur unnið til verðlauna. Kyrja kom einnig fram í hinu eftirminnilega Pokalagi í áramótaskaupinu árið 2022. Oddvitar Kyrju eru Philip Barkhudarov, Sólveig Sigurðardóttir, Pétur Oddbergur Heimisson, Jón Ingi Stefánsson og Þórhallur Auður Helgason. Aðrir meðlimir eru Bjarni Guðmundsson, Marteinn Snævarr Sigurðsson, Ragnar Pétur Jóhannsson, Stefán Sigurjónsson, Þorkell H. Sigfússon og Þorsteinn Freyr Sigurðsson.

MARÍA KONRÁÐSDÓTTIR 

María Konráðsdóttir lauk burtfararprófi á klarínett frá Tónlistarskólanum í Reykjavík árið 2007 undir handleiðslu Kjartans Óskarssonar. Hún nam söng hjá Þórunni Guðmundsdóttur við sama skóla. Sumarið 2015 lauk María bakkalárgráðu frá Listaháskólanum í Berlín. Hún útskrifaðist með meistaragráðu í ljóða- og óratóríusöng frá sama skóla vorið 2018. María hefur sungið á fjölda tónleika hér á landi og í Þýskalandi og unnið til alþjóðlegra verðlauna. Hún hefur komið fram í tónleikaröðinni Klassík í Salnum og sungið á hátíðum á borð við Óperudaga, Reykjavík Early Music Festival, Myrka músíkdaga og Sumartónleika í Skálholti. Þar söng hún titilhlutverkið í óperunni Dídó og Eneasi eftir Henry Purcell árið 2025. Haustið 2024 kom hún fram sem einsöngvari með Sinfóníuhljómsveit Íslands á barokktónleikum sveitarinnar. Sama ár söng María með sellóleikaranum Yo-Yo Ma á ráðstefnunni Hringborði norðurslóða þar sem verk eftir Viktor Orra Árnason var frumflutt. Nýlega söng hún hlutverk Florestine í óperunni Hliðarspori eftir Þórunni Guðmundsdóttur í Gamla bíó. María hefur sungið með sönghópnum Cantoque Ensemble og er meðlimur í kvennasönghópnum Yrkju sem flutti Næturvöku eftir Sergej Rakhmanínoff ásamt karlakórnum Kyrju árið 2025. María er stjórnandi Barnakórs Seltjarnarneskirkju og er klarínettukennari við Skólahljómsveit Vesturbæjar og Miðbæjar.

SÓLVEIG THORODDSEN

Sólveig Thoroddsen nam klassískan hörpuleik við Konunglega listaháskólann í Wales í Cardiff (Coleg Brenhinol Cerdd a Drama Cymru) og útskrifaðist með B.Mus.-gráðu árið 2013. Hún nam leik á barokk- og endurreisnarhörpur, með áherslu á þríraðahörpu, við Listaháskólann í Bremen og útskrifaðist þaðan árið 2016. Sólveig hefur komið fram á tónlistarhátíðum og í tónleikaröðum í Evrópu og Mið-Ameríku. Á Íslandi hefur hún komið fram á Reykjavík Early Music Festival, Sumartónleikum í Skálholti, Sumartónleikum í Sigurjónssafni og á Óperudögum. Auk þess hefur hún starfað sem lausráðinn stundakennari í uppfærslum Listaháskóla Íslands á barokkverkum. Árið 2023 gaf Sólveig út plötuna Consort of Two ásamt kostaríska lútuleikaranum Sergio Coto Blanco. Diskurinn hefur að geyma enska endurreisnartónlist og kom út hjá þýska plötufyrirtækinu Arcantus.